नवी दिल्ली:
दिल्लीतील जिम मालकाच्या हत्येत कथितपणे सहभागी असलेल्या लॉरेन्स बिश्नोई आणि हाशिम बाबा टोळीच्या ‘शार्पशूटर’ला शनिवारी नरेला भागात दिल्ली पोलिसांच्या स्पेशल सेलसोबत झालेल्या चकमकीत अटक करण्यात आली. अधिकाऱ्यांनी ही माहिती दिली.
पोलिस अधिकाऱ्यांनी सांगितले की, चकमकीदरम्यान कबीर नगर येथील रहिवासी मधुर उर्फ अयान याच्या दोन्ही पायात गोळी लागली आणि त्याला रुग्णालयात दाखल करण्यात आले.
पोलिसांनी सांगितले की, मधुर आणि त्याचा सहकारी राजू यांनी 12 सप्टेंबर रोजी ग्रेटर कैलाश-1 येथील जिमच्या बाहेर 35 वर्षीय नादिर शाह यांची गोळ्या झाडून हत्या केली होती. शाह यांच्यावर दरोडा, खुनाचा प्रयत्न यासह अनेक गुन्हे दाखल असल्याचे त्यांनी सांगितले.
एका पोलिस अधिकाऱ्याने सांगितले की, रात्री 8 च्या सुमारास स्पेशल सेलच्या टीमला मधुरच्या नरेला-बवाना रोडवर असल्याची माहिती मिळाली, त्यानंतर टीमने त्याला पकडण्यासाठी सापळा रचला.
त्याने सांगितले की, मोटारसायकलवरून निघालेल्या मधुरला रात्री ९ वाजण्याच्या सुमारास एका निवासी संकुलाजवळ थांबण्याचा इशारा देण्यात आला, परंतु पोलिस पथक पाहताच त्याने गोळीबार केला. पोलीस पथकाने प्रत्युत्तर दिले. दोन्ही बाजूंनी एकूण 11 गोळ्या झाडण्यात आल्याचे त्यांनी सांगितले.
अधिकाऱ्याने सांगितले की, “यावेळी मधुरच्या दोन्ही पायात गोळी लागली होती.” आरोपींनी झाडलेली गोळी उपनिरीक्षक आदेश कुमार यांनाही लागली, मात्र त्यांनी बुलेटप्रूफ जॅकेट घातलेले होते, असे पोलिसांनी सांगितले.
