संदिप बारटक्के, वृत्तवेध न्यूज
दौंड : दौंड शहरामध्ये बकरी ईद उत्साहात साजरी करण्यात आली. शहरातील मुस्लिम बांधवांनी बकरी ईद मोठ्या आनंदी वातावरणात साजरी केली. ईदच्या नमाज पठणासाठी मुस्लिम बांधव मोठ्या संख्येने ईदगाह मैदानावर उपस्थित होते.
जामा मशिदीचे मौलाना मुबीन आतार यांच्या नेतृत्वाखाली मुस्लिम बांधवांनी ईदगाह मैदानावर सामूहिक नमाज अदा केली. यावेळी मौलानांनी संपूर्ण देशामध्ये भाईचारा व शांतता नांदावी म्हणून अल्लाह कडे प्रार्थना केली. अल्लाह…. संपूर्ण देशामध्ये भाईचारा व जातीय सलोखा अबाधित ठेव, देशात शांतता नांदू दे, जे अडचणीत आहेत, आजाराने त्रस्त आहेत अशांना तू सर्व त्रासातून मुक्त कर, सर्वांना चांगल्या मार्गावर चालण्याची सद्बुद्धी दे अशी प्रार्थना मौलाना यांनी यावेळी केली.
बकरी ईद हा मुस्लीम बांधवांसाठी त्याग व बलिदानाचे प्रतीक मानला जाणारा महत्त्वाचा सण आहे. इस्लामिक पंचांगानुसार जिलहज्ज महिन्याच्या दहाव्या दिवशी बकरी ईद साजरी केली जाते.
यावेळी आमदार राहुल कुल, माजी नगराध्यक्ष प्रेमसुख कटारिया ,माजी नगराध्यक्ष इंद्रजीत जगदाळे, पुणे जिल्हा ग्रामीणचे पोलीस अधीक्षक संदीप गिल ,दौंड चे उपविभागीय पोलीस अधिकारी बापूराव दडस, पोलीस निरीक्षक गोपाळ पवार तसेच विविध राजकीय पक्षाचे पदाधिकारी, सामाजिक संघटनांचे पदाधिकारी यांनी ईदगाह मैदानावर मुस्लिम बांधवांची गळा भेट घेत ईदच्या शुभेच्छा दिल्या.